منح بكالوريوس

منح الجامعات الخاصة المصرية لطلاب الثانوية العامة

منح الجامعات الخاصة المصرية لطلاب الثانوية العامة.

طلاب الثانوية العاملة اللي خلصوا امتحانات الف مبروك وإن شاء الله كل واحد يجيب المجموع اللي بيحلم بيه ويدخل اللي الكلية اللي نفسه فيها نركز بقي يا شباب ويا بنات في الكلام الخطير ده لأننا هنتكلم عن منح الجامعات الخاصة المصرية لطلاب الثانوية العامة.

المنح الدراسية في الجامعات الخاصة المصرية :-

عندنا في مصر جامعات خاصة كتير جدا والجامعات دي برضو تعليمها كويس جدا الجامعات دي بتقدم منح للطلاب المتفوقين في الثانوية العامة واللي وقفت معاهم الكليات اللي عايزينها علي حاجات بسيطة وكمان علي حسب الحالة المادية والاحتياج. تعالوا بقي نشوف ايه هي منح الجامعات الخاصة دي.


مواعيد الاعلان عن المنح :-

المنح دي بيبدأ الاعلان عنها من اول شهر 8 وتختلف من جامعة لجامعة في اي وقت من الشهر وبتعرف بيها يا اما عن طريق صفحات الجامعات علي الفيسبوك او وسائل التواصل الجتامعي التانية او انك تروح تسأل في الجامعات وتتأكد من التفاصيل بالظبط


ايه الجامعات اللي بتقدم المنح:-

1- جامعة مصر للعلوم والتكنولوجيا MUST
2- جامعة 6 اكتوبر O6U
3- جامعة الحديثة للتكنولوجيا والمعلومات MTI
4- جامعة مصر الدولية MIU
5- جامعة النهضة في بني سويف
6- الجامعة الروسية في مدينة بدر
7- جامعة حورس بدمياط الجديدة
8- جامعة بدر في القاهرة
9- جامعة دراية في المنيا
10- جامعة فاروس في اسكندرية
(ممكن جامعات تانية تنزل منح الله اعلم احنا في الانتظار)


الشروط والأهلية :-

1- خريج مدرسة حكومية مصرية يعني ده مش متاح للمعادلات

2- لازم تكون مصري ابن مصري ابن مصرية

3- متخرج من الثانوية العامة في نفس السنة اللي هتقدم فيها يعني السنة دي 2019 يبقي لازم تكون مخلص ثانوي في السنة دي مش سنة قبل كدة

4- بالنسبة للمجموع ان تكون معدي ال90 % او هتلاقي ان في جامعات ليها الحد الادني والتنسيق الداخلي بتاعها يعني مثلا لو انت هتقدم صيدلة والتنسيق الداخلي في الجامعة دي ان الحد الأدني لصيدلة 96 يبقي لازم تكون جايب الحد الأدني ده ولو كتر يبقي كويس وده زي اللي في جامعة مصر ممكن تكون كل الجامعات كدة وكلهلم ليهم تنسيق داخلي المهم تكون جايب مجموع عالي ان شاء الله

5- شرط مهم جدا انك تكون مقدمتش يعني مملتش الابلكيشن بتاع الجامعة يعني مروحتش الجامعة وومليت ابلكيشن عشان تقدم

(شروط عامة في كل الجامعات ممكن يكون في جامعة ليها شروط تانية بس الحاجات دي تقريبا ثابتة في الكل)


المستندات المطلوبة :-

1- شهادة الثانوية العامة بتاعتك اللي اخدتها السنة دي من المدرسة وكمان بيان الدرجات وده بتجيبه من الادارة التعليمية اللي انت تابع ليها وبيسألك عن الجهة اللي هو موجهة ليها فلو كذا جامعة مضطر تجيب اكتر من واحد وتمنه 20 جنية تقريبا.

2- محتاج تجيب مفردات مرتب السيد الوالد ملكش انت دعوة قوله هو وخليه يتصرف وبرضو محتاج اكتر من واحد لو هتقدم في اكتر من جامعة.

3- محتاج تعمل بحث اجتماعي ويكون الجهة الموجهة لها الجامعة اللي هتقدم فيها يعني لو هتقدم في كذا جامعة يبقي تعمل بحث اجتماعي لكل جامعة وده بيتعمل في مجلس المدينة او المجلس المحلي في البلد عندكم تقريبا المهم ايا كان قول لبابا وهو هيعمله برضو.

4- محتاج انك تجيب اثبات قيد من المدرسة بتاعتك وكمان تجيب اثباتات قيد لاخواتك لو هم في التعليم برضو. وعلفكرة من الشروط برضو اللي نسيتها انه مش يكون ليك اخوات في جامعات خاصة

5- محتاج يا سيدي انك تجيب تجيب صور بطايق البيت كله انت وبابا وماما وناهد وكل اخواتك ولو مش معاه بطايق يبقي تجيب شهادات الميلاد .


(مستندات عامة في كل الجامعات ممكن يكون في جامعة ليها مستندات تانية بس الحاجات دي تقريبا ثابتة في الكل)


مميزات المنح دي :-

1- مقعد دراسي مجاني يعني مش بتدفع حاجة من المصاريف اللي موجودة في الصور دي
2- بتدفع ثمن الكتب
3- بتدفع بس تأمين علي المعامل بيختلف تنمه من جامعة لجامعة

شروط استمرارية المنحة :-
1- انك تكون جايب تقدير جيد كحد ادني كل سنة ممكن ده يختلف من جامعة لجامعة فلازم تسأل وتتأكد برضو


لو جايب فوق 97 قدم بشري
لو جايب فوق 96 قدم صيدلة او اسنان
لو جايب فوق 95 قدم علاج طبيعي
لو جايب فوق ال 90 في علمي رياضة قدم هندسة

أنا كدة جبتلكم الخلاصة عن منح الجامعات الخاصة المصرية لطلاب الثانوية العامة. واستنوا بوستات كتير جاية عن المنح الدراسية برة مصر
اللي متحاج اي حاجة يتفضل يسأل في التعليقات عشان كل الناس تعرف وتستفيد من الاسئلة المهمة واعمل منشن لاحي حد ثانوية عاملة تعرفه
بالتوفيق للجميع

لنبقي علي تواصل

صفحتنا علي الفيسبوك المنحة

قناتنا علي تلجرام المنحة

حسابنا علي انستجرام

حسابنا علي لينكد ان

حسابنا علي تويتر

مجموعتنا المخصصة للمنح الدراسية

https://www.facebook.com/groups/1090016134522461

التالي
منح دراسية لدراسة الماجستير في جامعة لوزان في سويسرا
شاهد أيضاً

اترك تعليقاً